مسفر: ها ..

لوجين: وشو ..ابربيه ...

مسفر: وانا معك ..

لوجين تغير وجهها : اكيد ...

ناصر: عن اذنكم ..

بعد ماطلع ناصر جلست لوجين على الكرسي تنااظر بالبزر البرياء اللي نام ..كيف بتربيه وهي وقت المخدرات ماتعرف احد .. هي يبغالها من يربيها ...

ناضرت بمسفر ودموعها متجمعه بعيونها: انا مو قد المسوليه ..

مسفر لقاها فرصه مناسبه ... ارتبك وعرق وتوتر ..: لوجين من زمان ودي اقولك من اول ماجيت من السعوديه .. لوجين تتزوجيني ..

لوجين فز قلبها وصار يدق بقوه ... كانت تتمنى هالشي بفارغ الصبر بس بعد ماكتشفت مسفر على حقيقته انقتلت الفرحه من قلبها وناظرت تدور على الصدق ومشاعر الحب ... ومع الاسف شافت بعيونه مشاعر اكبر من مشاعرها حب وعطف وحنان .. بكت ..

مسفر مشى لعندها ليه تبكي ماتبغاه ماتحبه ..: ليه ليه الدموع ...؟

لوجين: اكيد موافقه مايبغالها كلام ..

*****************************
السعوديه – الرياض

نواره ماسكه الورقه وبيدها الجوال وقبالها الجوري تشرب عصير .. والبندري ترتب شنط الجوري ترتيب اخير ..

نواره : بما اننا بالشفاء فاقرب المشاغل عندنا . .. مشغل المشاعل تبغوا احجز لكم فيه

البندري : خساره ياليتنا ماسكرنا المشغل كان هاللحين استفدنا ...

الجوري وهي تشرب العصير : كيفكم احجزوا اللي تحبوا ..

نواره : انت مالك دخل ماعندنا بنات بيتزوجوا يحكون ..

الجوري: ههههههه

البندري:يقولوا مشغل معالي ... خطير و

الجوري: لا هذا كان ينافسنا مانبغاه ..

البندري: اوكيه مشاعل مشاعل ..

نواره : لحضه في مشغل رحنا لعنده انا ولوجين بالاجازه قبل سنتين شغله جنان وبيعرفوا لفستان الجوري لانه ذهبي

الجوري: اهم شي المكياج ناعم ..

نواره : ايوه انتي بنفس بياض لجون واكيد راح يطلعوك تجنني مثلها اسم المشغل .. نسيت خليني ادق على لجون تعرفه ..

البندري: بالمشمش تعرفه اذا انتي ياللي ساكنه بالرياض ماعرفتيه هي بتعرفه ..

نواره: لا لجون بسم الله عليها ذاكرتها قويه ..

دقت على لوجين ...

*************
بريطانيا – لندن

ولوجين على حالها تناظر اخوها ومسفر وهي تبكي ..ومسفر يحاول يهديها مو راضيه تبكي من غير لاتحكي لما دق جوالها اللي كان بجيبها ..مسكين مسفر الصغير صار يبكي من النغمه العاليه ..

مسفر رفع مسفر الصغير عن لوجين : ردي ..

لوجين ناظرت الرقم : هذي نواره

مسفر : اوكيه ردي

لوجين: ماينفع بتعرف

مسفر: وش تعرفه ..

لوجين : بتعرف اني ابكي يالله وش اسوي

مسفر: حياتي لجون ليه كذا متوتره وترتجفي وشفيك ..

لوجين بكت اكثر ..مسفر عرف ان فيها شي غير الطفل ..: كرستينا كرسيتنا



كريستينا : نعم ماذا هناك

مسفر: خذي الطفل يبدو انه جائع

كرستينا خذته وهي مستغربه من طفله وش يسوي هنا : حسننا

مسفر جلس بجنب لوجين اللي ذابحه نفسها بكي من الصباح : لجو حياتي وشفيك

ناظرته لوجين بعتاب وقلبها يدق بسرعه

مسفر : حبيبتي وش اللي مضايقك ..

لوجين رمت نفسها بصدره وهي تبكي بزياده .. ضمته ودها تقوله كل شي وكل اللي صار لها بحياته واللي جالس يصير .....: انا ماحب البزارين بس مسفر غير اول مره اشيل طفل مسفر غير ..

رجع جوالها يدق مره ثانيه ...

مسفر: حرام ردي اكيد خايفه عليك ..

لوجين :ماقدر ماقدر اكلمها بتعرف

مسفر: وش اللي بتعرفه ..؟

لوجين ..((انك كذاب ونصاب وغشاش وطماع ومثلك مثل احمد وعلي ...))

مسفر تنهد : خلاص براحتك

دق الجوال مسج " لجو حياتي انتي اذا قمتى من النوم دقي علي ضروري ابغى اعرف اسم المشغل علشان زواج الجوري .. انتبهي على نفسك والبنات كلهم مشتاقين لك ويسلموا عليك .."

ابتسمت لوجين بين دموعها وضيقتها : ياحياتي يانونو دايم تدق وانا متضايقه كانها تحس ...

مسفر ضمها بقوه لصدره حسها محتاجه لصدر تبكي عليه وتقوله اللي فيها
****************
السعوديه – الرياض

نواره : السخيفه حد ينام الساعه 11 بالليل

البندري: هيه مع وجهك اي 11 بالليل هاللحين

نواره قاعتها : قبل لاتتذاكي هي ببريطانيا مو هنا

البندري بفشيله : ايوه صح ..

الجوري تناظر جوالها مكالمتين ابراهيم : بنات اطلعوا لبره شوي

البندري ونواره عصبوا : ليه ان شاء الله

الجوري: ابغى احس بالخصوصيه شوي

نواره: لاحياتي هذي صارت غرفت اللكل ومو ان زواجك قرب خلاص تتامري علينا

البندري: استحي على وجهك ومافيه خصوصيات

فتحت ذوق الباب من غير لاتدقه وبيدها اكياس : هااااااي

الجوري: كملت

البندري: هههههه حياك الله اقلطي معنا

نواره : هلا والله بذوذو

ذوق: هلا فيكم وش عندكم ترحبوا

الجوري معصبه : من الادب يانسه ذوق تدقي الباب

ذوق: هههههه في حد يدق باب غرفته

البندري ونواره : ههههههه

الجوري: جد كملت

ذوق: ووشفيكم احس ان فيكم شي

نواره: هههه ماعليك منا وقولي وش جايبه ..

ذوق بحماس رفعت الاكياس: توني انا وعدولي راجعين من السوق ومرينا على المشغل وخلص الفستان ..- لفت على الجوري- فستانك ياعروس

الجوري انقبض قلبها لما قالت فستان حست بالضيقه ..

البندري ونواره ركضوا لعند ذوق

نواره : والله وينه

البندري: طلعيه بسرعه ..

طلعت ذوق فستان ذهبي طويل وببدايته شريطه ذهبيه يعني تكون مثل القصه تحت الصدر وعاري من الظهر لنصه يعني مو عاري مره ...

نواره : ليه ذهبي ماحسه لعروس

البندري: بالعكس يخبل

ذوق: جور قومي قيسيه ..

الجوري مسكت عكازها ومشت لسريرها وهي ساكته ومن غير لاتناظر الفستان .. تمددت على سريرها وعطتهم ظهرها وتغطت بتنام : تصبحوا على خير اطفوا النور وسكروا الباب معكم

نواره توها بتنطق اشرت لها البندري تسكت : يله بنات نخلي جور على راحتها ...

حطت البندري الفستان على الكنبه وهي متاكده ان الجوري تبكي هاللحين وطعتم وسكرت الباب ..

نواره وذوق سكتوا ولاناقشوا الموضوع جلسوا يسولفون شوي بعد كذا كل ووحده راحت لبيتها ..

الجوري بعد ماسكروا الباب صارت تبكي كان نفسها يكون زواجها غير غير كل هذا ومالقت غير ابراهيم تحاكيه ...

******************

ابراهيم وبدر واخوهم سعود جالسين بالخيمه اللي مسوينها بالبيت مثل اغلب بيوت السعوديه ..

بدر: رد ياعم اكيد خويتك دقت

ابراهيم : تسلملي هي وعيونها ..آلو

الجوري بصوت مخنوق :الو

سعود : اوه شعنده الدكتور بايعها وصار يخاوي

بدر: مادريت اخوك عشقله مريضه يقول طرانه وفري

سعود : ومزون ..؟

بدر : مسكينه بنت عمي سحب عليها .

ابراهيم : جيجي دقيقه ... انتم وبعدين معكم

بدر: اسكت سعود نشوف كيف يصيع اول مره ههههه

سعود:ههههه

ابراهيم : الو كيفك

الجوري: متضايقه متضاايقه مره ياابراهيم

ابراهيم حس من صوتها انها تبكي : وشفيك .. ليه تبكين .. سوالك شي ..

الجوري: لا انا ماشوه بس اليوم جابوا فستاني ..

ابراهيم: طيب وشفيها ..

الجوري: ابراهيم موهذا الزواج اللي انا ابغاه مو هو الشخص اللي حلمت فيه وكتب ه اشعاري ايام المراهقه ..

ابراهيم : حنا وش حكينا هو صار زوجك وانتي اللي اخترتي ..

بدر: متزوجه ههههه

سعود: الطيور على اشكالها تقع ..ههههههه

ابراهيم: دقيقه اطلع من هذولا القلق ماني قادر اسمعك ..

بدر يمسك التكايه ويضمها : جيجي لحضه ماني قادر اسمعك ..

سعود:هههه هذا مايدل الرومنسيه

طلع ابراهيم وتركهم .. بدر المسكين مادرى ان هذي زوجته اللي يحاكيها اخوه ...

*****************
يوم الاربعاء
بيوم الزواج اليوم الموعود ...الزواج كان ببيت عم الجوري مراعاة لظرروف بدر لان ماصار على وفاة اخوه حسان الا اسبوعين

البنات (( نواره والجوري والبندري وذوق )) ... جالسين بغرفة الجوري ... والعاملات يزينونهم خلصت البندري اول وحده لانها بتزين الجوري ...لانها رفضت تحط اي مكياج كثير وطلبت من البندري تحط لها ..... علشان تصير اخر ذكرى لهم مع بعض ...

نواره بفستانها الاسود واكسسوار الشعر الذهبي تناظر نفسها بالمرايه :جور ماعندك سالفه تخلي البندري تزينك

البندري: والله وشفيها البندري ...؟ مو عاجبتك ..؟

الجوري مقفله معها وعلى اعصابها تصارخ : انتي معها راسي يعورني ومالي خلقكم

البندري : احمدي ربك انها رضيت بمكياجي كانت بتروح لرجلها كذا .. وبالموت اقتنعت

الجوري وقفت: خلاص مابغى مكياج

البندري بسرعه: لالالالالالا تعالي بقي المسكرا والروج بس ...

الجوري جلست وطاحت شنطة المكياج على الارض

البنات والعاملات شهقوا ..

الجوري معصبه : لحول من امسك شي يطيح وش السالفه

ذوق: حصل خير خلاص خلاص سليمه ...

البندري : اجلسي بقى المسكرا تكفين خلينا نخلص

جلست الجوري وهي تهز رجلها ...

ذوق بعد ماخلصتها الكوافيره : ها وشرايكم

نواره: ياي تجنني وين عادل عنك