|
نفسي أطلع الاولى
اسمحولي ما عرفت احط الموضوع باي قسم!!!
وقلت احطه في قضايا المجتمع لسببين 1- وأنا بهالحالة قاعدة انظر لنفسي بعظمة شديدة لدرجة اني حاسة اني انا المجتمع بكاملة 2- ان المشكلة اللي بطرحها يواجهها ناس كثير في مجتمعنا أخي العضو ما جاك احساس او رغبة في انك تكون الاول على الصف وكانواحد من جنسية عربية اخرى غير جنسيتك كان دايما ياخذ الاول ويوم تاخذون الشهادات يحط ايده على وجهك ويحركها ويقولك ياحراااام مسكين مو شاطر مثلي ويغيظك اختي العضوة ماكان نفسك وانتي في الابتدائي تكوني اكثر البنات شعبية ؟؟؟ ولسوء الحظ في بنات كثيييييرأحلى منك ودمهم اخف من دمك ستمية ألف مرة والبنات يحبوهم اكثر منك ونار الغيرة تستعر في قلبك وتروحي السوق انتي وامك بس عشان تشتري بكلة وشريطة جديدة وتروحي اليوم الثاني وتلاقي البنت اللي تكرهيها لابسة أحسن منها ؟؟؟ اخي العضو تذكر يوم كان عندكم يوم مفتوح بالمدرسة وكل واحد يجيب معه الفلوس اللي يبيها عشان يشتري كل شي نفسه فيه , ومن سوء حظك ابوك ضربك في اليوم السابق وكنت خايف في الصباح تطلب منه فلوس ... ومن سوء سوء حظك ان اصحابك كلهم تركوك تناظر فيهم هم يشترون كل اللي يقدرون عليه وانت لسان حالك يقول : عيد بأي حال عدت يا عيد بما مضى أم بأمر فيك تجديد هاااااااا لا تنسى حصة الرياضة وملابس الرياضة المقطعة اللي تجيبها معاك مع العلم انك ابدا مو فقير بس المشكلة بأبوك وامك يقولولك كل مرة نشتريلك بدلة رياضة جديدة وكل مرة تقطعها ومن سوء حظك يكون واحد من زملائك قاطعها لك ومستحي تقول لأهلك ومن سوء سوء حظك يكونوا أهلك شافوا برنامج تربوي ويبوا يطبقوه عليك >>>>> مخلفين فار تجارب اختي العضوة تذكري معاي شوي وخلي ذاكرتك ترجع معاي شوي لورا تذكري العلبة اللي نحط فيها السندويتش والعصير والشيبس >>>>> يووه ما تذكرتيها !!!! العلبة اللي مرسوم عليها باربي هذي انتي ما كان عندك منها انتي كنتي تشيلي ساندويتشك وعصيرك في كيس نايلون قريب ينقطع صح ؟؟؟ طيب أنا كنت مثلك ليييييه؟؟ ما ادري بس جا اليوم اللي اشتريت فيها هالعلبة ومن حسن حظي >>>>( أقصد من سوء حظي) كان مع العلبة زمزمية موية ومرسوم عليها باربي بعد زمزمية الموية اغسلي يدك منها لأنها بالأساس تسرب الموية وأصلا لما عبيتها موية وحطيتها بالفريزر عشان آخذها اليوم الثاني لقيتها مكسورة عشان الثلج لما كان فيها الظاهر كان متضايق وكسر الزمزمية وضغطت على نفسي وقلت يا بنت ما عليك خليك قوية وانظري للجانب الايجابي لأن العلبة بعد ما صارلها شي وبالنسبة للعلبة لما رحت اليوم الثاني وأنا فرحانة فيها جات وحدة من صحباتي كانت غيرانة مني وكسرتها (على أساس انها كسرتها من غير قصد ) :0560: :0560: آآآآآآآآآآآآآآآآآآآآآه بعدني ما خلصت وبعد آآآآآآآآآآآآآآآآآآآآآآآآآآآآآآآه ليش ياربي كذا ؟؟؟ بس الحمد لله على كل حال اخي العضو لما كبرت وصرت بسن المراهقة ما حسيت نفسك انك صرت قوي وصرت تناظر في كل الاولاد نظرة استعلاء مع ان ريحة المراهقة فايحة منك وانت راجع من ملعب الكورة >>>>> ( لأنك بالاساس كنت محروم من شي وانت صغير ) المشكلة مو هنا المشكلة عند البنات البنت لما تصير بمرحلة المراهقة يطلع بوجهها حبوب وتصير تستحي والبنات اللي كانت تكرههم وهي بالابتدائي بقدرة قادر يصيروا معها بالاعدادي وزمان كانت تكرههم والحين صايرة مو بس تكرههم إلا تستحي منهم لا صايرة ودها لو تلبس طاقية الاخفا وتختفي من على سطح الارض وتزيد الطين بلة لما تحط حرتها بالاكل وتاكل وتاكل وتاكل وتاكل ولما تشبع تتعب وتنام ولما تصحا من النوم تذكر معاناتها وتحط حرتها في الاكل مرة ثانية وتاكل وتاكل وتاكل وتصيير دبببببة مو بس كذا بعد حبوبها تزيد وتصير نفسها تلبس طاقية الاخفا عشان حتي هي ما تناظر في نفسها وبعد كل هذي المعاناة أحب اطلب منكم طلب صغيروووووووووون وهو ان كل واحد عانى من شيء في صغره او ممراهقته او يعاني منه الآن يكتب عنه وإذا كان مستحي يقول كان واحد من أصحابي يعاني من هالمشكلة عاااااادي كلنا اخوان وستر وغطا على بعض صح :www.almakan.net15: :www.almakan.net15: |
رد: نفسي أطلع الاولى
شكرا على الموضوع الرائع
وانا في صغري ما اضن كنت اعاني كنا ضغاار ما نهتم حياتنا كلها لعب بس اللي اتذكرها ربيعتي (......) من رووضة لين صف ثالث عقب افترقنا ما شفتها لين الحينه بس ودي اشوفها مرات اكلمها على التلفون .. اما الحينه صارت لي فترة ما كلمتها وما ادري عنها.. بس اللي استغربت منها انها هي قرييب تتزوج ما ادري الحينه تزوجت وراحت وله شنو صار لها.. والحينه الحمدلله يعني مافي شيء كبيير اعاني منها يمكن اشياء بسيطه بس هي صح انا اعاني ها الايام من الحبوب طلع لي حبه وحدة فوق شفايفي .. وطلع لي حبوب صغار بس مو ظاهرين بس صرت منقهرة و اقول الحينه من حلاتي عسب يحسدوني خخخخخ واعاني من ابله ... بس ساكته عليها اما الصداقه الحمدلله الاصدقاء مهما صار بس يهتمون فيني مرات اقول حق ربيعتي (....) انتي روحي في صفنا وانا بروح اصلي وارجع لاني لما اصلي مرات ودي اصيح واصيح ولما اروح المسجد مال المدرسه .. مع انه بنات اللي يصلون شويه ماعليه .. ومافي إمام .. بس انا احب اروح اصلي مكان الإمام لاني لو صحت محد يروم يشوف شكلي بس لما اصيح ربعي ما يخلوني .. يخربون علي بس ماعليه الله لا يحرمني منهم ^ــ^ وبس انا ماعندي شيء اعاني منها الحمدلله وشكرا مرة ثانيه على موضوع |
رد: نفسي أطلع الاولى
والله ما ادري شوا اقولك يا احب الدنيا
|
رد: نفسي أطلع الاولى
حبيبتي حنان معاناتك بسيييييييييييطة مع انها معاناة لكن لما تكبري راح تتذكريها وتضحكي
استمتعي بأيامك على قد ما تقدرين |
رد: نفسي أطلع الاولى
إقتباس:
ما عندك معاناة ولا مستحي تكتب معاناتك مولازم تكتب اللي في قلبك المهم تعلق على موضوعي اللي كتبته بكلام غير الجملة اللي كتبتها ( اعتقد انه موضوع يقلب جراحاتنا عشان كذا مافي ردود كثير ) |
رد: نفسي أطلع الاولى
أحب الدنيا
عزيزتي مشكورة على الموضوع الحمدلله ماكنت اعاني من اي مشكلة كنت من الشخصيات البارزة دايما صديقات بطول المدرسة وعرضها أحيانا من صفوف اكبر مني وما يمنع من صفوف اصغر من صفي رغم تفوقي وتميزي الحمدلله لم اكن مغرورة بل كنت احظى بحب الجميع والي كان نعمة والحمدلله كنت الاحظ وجود اناس منطوية بسبب بلادتها او ظروفها او طباعهم الشخصية لكن الحياة كذا ...ومن ناحيتي نظرتي للناس ظلت كما هي ما تحكمها اهواء وفقاعات ما تلبث وتزول الحمدلله عشت حياة هادئة بطفولتي رغم بعض الصعوبات وشكرا لصاحبة الموضوع شكلك يا احب الدنيا معلمة روزري |
رد: نفسي أطلع الاولى
احب الدنيا موضوع جميل واشيا مثل هذه قد تمر على الانسان خلال سنوات عمره .... قد لاتكون بنفس الطريقة ولكنها قريبة لها ..... |
رد: نفسي أطلع الاولى
شكرا روزي
وشكرا ابن الصحراء على المرور الخجول احب اقولكم ان في ناس كثييييييييييييير يعانوا من هالمشاكل ويحسوا انهم غير مرئيين واحنا ككل ما ننتبهلهم ليش ما ادري في كثير من المشاكل مهما كانت صغيرة وبسيطة إلا انها تبقى عالقة في الذاكرة وبدون سبب |
رد: نفسي أطلع الاولى
هلا أختي أحب الدنيا موضوع جميل
عندي إضافة .. دع الأيام تفعل ما تشاء وطب نفساإذا حكم القضاء ولا تجزع لحادثة اللليالي فما لحوادث الدنيا بقاء أبيات من قصيده جميله للشافعي رحمه الله شكرا ... |
رد: نفسي أطلع الاولى
احب الدنيا
الموضوع .......جميل جدا بعض الأحداث والمواقف تنكتب ذكرياتها ... على صفحات الماء وبعض لمواقف... تنكتب ذكرياتها........... بحروف من نار وكثير من المواقف الي بكتنا في يوم.... إرجعت وضحكتنا في يوم ثاني وكأنها تقول لنا..... الحياة دمعة وإبتسامة... |
رد: نفسي أطلع الاولى
دلوعة وطالب القرب اضافاتكم رائعة ومحلية الموضوع على الرغم من انه نكدي شوي
بس اتس اوكي اللي مستغربة منه ان هالموضوع وغيره من المواضيع تلامس ولو جزء بسيط من نفوسنا وبالرغم من كذا نتجاهله او نتجاهل ذكرياتنا البائسة هذا اللي ممكن نسميه الكبت والشي الثاني اللي مستغربة منه هو اني غبت عن المنتدى فترة طويلة وللحين موضوعي فوق ومحد كتب موضوع جديد ليش ؟؟؟؟ بس بجد جزاكم الله خير على ردودكم الطيبة |
رد: نفسي أطلع الاولى
إقتباس:
|
رد: نفسي أطلع الاولى
آآآآآآآآآآآه كلما تذكر المدرسة وأيااااااااااام المدرسة أمامي...أسبح في أحلامي وذكرياتي الجميلة...
أختي لكل منا ذكريات قد تكون آليمة في تلك المرحلة...ولـــكن عندما نتذكرها الأن نضحك عليها... ذاك زمان لهونا به....وهذا زمان بنا يلعبُ |
رد: نفسي أطلع الاولى
الفارس الاخير اشكر تواصلك واهتمامك
وصاحة المبادي كل واحد عنده ذكريات حلوة وذكريات اليمة بس انا حطيت الموضوع هذا في يوم كنت متضايقة فيه |
رد: نفسي أطلع الاولى
الله يعطيك العافية أحب الدنيا على هذا الموضوع
والله يرحم أيام الطفولة |
| الساعة الآن: 07:51 AM |
vBulletin ©2000 - 2024