عرض مشاركة مفردة
  #4  
قديم 22/03/2006, 04:35 PM
متوكل طه محمد احمد
مُشــارك
 
الفارس والاسير
نهدى اليكم
بحر المودة
شوفي الزمن يا يمة ساقني بعيد خلاص
جرعني كاس
دردرني اتغربت واتعزبت يا يمة وريني الخلاص
يا يمة يا نور الصبح وكتين يطل
يا يمة يا بدري البشع دائماً يهل
يا يمة يا فيض الحنان الما كمل
وآشري يا زينوبة ولدك في بحور الشوق كتل
محروم من الحب والمحنة وراءك همل
يا يمة يا نغماً حنين بالشوق يرن
وافكاري فيهو بيرتعن
ودمعاتي شانو بينزلن
ازكرك يا يمة يا يمة في الدقش النسايمو يهبهبن
قائمي الصباح متكفلتي شايلة الحليلة على المراح
جبتي اللبن بي انشراح
في الساعة ديك يا دوبو ديكنا بدأ الصياح
والطير صغارو يغردن
اتزكرك يا يمة يا يمة في ساعة الهجير
صاليك نار الدوكة عوستلنا الفطير
رشيتيه قلت اكلوه خير
بزكرك يا بسمة الطفل القرير
وكت الخلوق ترقد تنوم
اسهر براي مع النجوم
والشوق يرف جنحينو بي فوق لي يحوم
واهتف بي اسمك في الخيال
طيفك كمان بي فوقي جال
اتمنى لو لحظات يدوم
لكني فجاءة القاه زال
يا يمة يا بحر المودة وكت يفيض
يايمة يا شعلة امل زادت وميض
يا يمة يا عنقود كلام منظوم قريض
اتزكرك يا يمة يايمة
وقت الناس يجونا من البلد
ناعم ترابها علي جسيماتم رقد
ريحة التمر فوق الهدوم لون الخضار خانس لبد
والشوق اواره بشتعل كان ظني فيهو يكون خمد
اتزكرك يا يمة يا يمة والناس قالو قائمين البلد
رصو الهديمات عدلو ركبو اللواري وقبلو
خلوني وحدي بلا انيس
كيف انفرادي اتحملو
شالو السلام انا مني ليك
يا يمة ساعة يوصلو ويقول ليك شفناه في بلد الأمان
يا يمة رسل لي عفوك ينجيني من جور الزمان
يا يمة رسل لي عفوك ينجيني من جور الزمان
يا يمة رسل لي عفوك ينجيني من جور الزمان



من مواضيعي :